Кіші қосаяқ (лат. Allactaga elater) - қосаяқтар тұқымдасына жататын кеміргіш. Кіші қосаяқ Қазақстанның барлық жерінде мекендейді, тек таулы жерлер мен құмды шөлейтті жазықтарда сирек кездеседі. Дене тұрқы 5 - 15 см, салмағы 40 - 70 г, құйрығының ұзындығы 7 - 25 см. Артқы аяқтары үлкен, 5 саусақты. Алдыңғы аяқтарымен қорегін ұстап, ін қазады, іннің ұзындығы 2 м, тереңдігі 70 см дейін барады. Кіші қосаяқтар қыста ұйқыға кетеді және жер бетіне наурыздың басында шығады. Кіші қосаяқ қоректенуге ымырт түскенде шығады, олар түнде өсімдіктердің тамырларымен, дәнімен және жәндіктермен қоректенеді. Кіші қосаяқтар нағыз желаяқтар, жүгіргенде жылдамдығы сағатына 48 шақырымға жетеді.
