Қара дегелек (Ciconia nigra). Мәртебесі. Халықаралық деңгейде қорғалатын түр. Қазақстанның Қызыл кітабына сирек кездесетін түр ретінде тіркелген. Қорық аумағында қазіргі кезде тек тамақтану кезінде кездеседі. Қарадегелектер Ынталы ауылының жоғарғы жағындағы сайларда ұялайды, бірақ 30-40 шақырым жердегі қорық аумағына келіп қоректенеді. Биылғы жылы қарадегелектер Тентек өзенінің жағалауынан және Ынтымақ көлінің аумағынан тамыз айында 19 дарасы тамақтану кезінде есепке алынған. Ал күзгі көшіп-қону кезінде кыркүйек айында 21 дарасы есепке алынған. Ірі биіктігі 1 м-дей, салмағы 3 кг-дай ұзын сирақты құс. Үсті тұтастай, сол сияқты басы мен мойны металтәрізді жылтыр қара, құрсағы шымқай ақ. Үндістанда қыстайтын құс. Ұясын ағаш басында биікке салады, бірақ біздің жағдайда қиын жартастар мен жарларға жиі ұялайды. Ұядағы 2-6 ақ түсті жұмыртқаны 32-38 күн шайқайды, балапандары ұяда екі айдай болады. Суқоймалардың жағалауларында майда балықтар, қосмекенділер және олардың личинкаларымен қоректенеді.
