12.03.2025 ж. Алакөл мемлекеттік табиғи қорығының ұйымдастыруымен «Алакөл өңірінің құндылығы – Тентек өзенінің атырауы» атты дөңгелек үстел өткізілді. Мұндағы басты мақсаты - әлемдік маңызы бар табиғи кешені және UNESCO объектісі болып табылатын Тентек өзенінің атырауының биоалуантүрлілігіне кері әсерін тигізетін факторлардың бірі - жаз маусымында Тентек өзені суларының қомақты бөлігі егінді жерлерге алынуына құзырлы органдардың назарын аудару және осы су мәселесінің шешу жолдарын талқылау. Аталған іс-шараға Алакөл қорығының басшылығы мен қызметкерлері, жергілікті мекеме басшылары, «Amanat» партиясының Алакөл аудандық филиалының басшысы қатысты және «Су ресурстарын пайдалануды басқару және реттеу» бөлімінің басшысы, Жетісу облысы бойынша су ресурстарын реттеу, қорғау және пайдалану бөлімінің басшысы, «Казгидромет» Жетісу облысы бойынша филиалы - гидрометерология бөлімінің басшысы, Жетісу облыстық орман шаруашылығы және жануарлар дүниесі аумақтық инспекциясының бөлім басшысы ЗУМ қосымшасы арқылы қатысты.
