Мәртебесі. Ұлттық деңгейде қорғалатын түр: Қазақстан Қызыл кітабына, Әлемдік сирек құстар тізіміне, СИТЕС II Қосымшасына енгізілген. Алакөл қорығының аумағында қыстайтын сирек кездесетін түр, қазіргі таңда саны 21 дараға жеткен. Соңғы бес жылда қорық аумағында бес ұя салатын жұбы мен бір жынысы жетілмеген жұбы кездесетін. Тентек өзенінің атырауындағы биік талдардың үстінде орналасқан осы құс түрінің бес ұясы бізге мәлім болған, біріншісі – Кіші Жылыкөл көлінің жағасында, екіншісі – Тұйықсу тармағының сағасында, үшіншісі – Опытное көлінің маңында, төртіншісі – Мыңкөл көлдерінің оңтүстік – батысында орналасқан және бесіншісі – Еміл өзенінің атырауындағы қураған ағашта орналасқан. Жыл сайын осы ұяларда 1-2 балапан шығарылады, бірақ олар қорық аумағында қалмай, шекаралас аумаққа тарап кетеді.
